د لوی اختر له رخصتۍ وروسته د تنظیف کارکوونکو له لوري د ویالو د پاکولو او د کثافاتو د انتقال چارې ترسره شوې
د لوی اختر له رخصتۍ وروسته نن د مهترلام ښاروالۍ د تخنیکي او مسلکي آمریت ترچتر لاندې د تنظیف او زرغونتیا مدیریت زیارکښو کارکوونکو له لوري د ښار د ویالو او پلچکونو د پاکولو ترڅنګ د کثافاتو د انتقال او د کثافت دانیو د پاکولو چارې ترسره شوې
یاده چاره د مهترلام ښاروال الحاج مولوي نظر محمد عتیق په خانګړې لارښونه د تنظیف مامور عزت الله نیازي په مشرۍ ترسره شوه، چې له ویالو او پلچکونو څخه ټول کثافات راوویستل شول او همداراز هغه کثافت دانۍ چې په ساحو کې د اختر د پاتې شونو او کثافاتو له امله ډکې شوې وې خالي او کثافات یې د چاپېریالي اصولو مطابق یو لیرې ځای ته انتقال او دفن شول
د یادونې وړ ده چې د مهترلام ښاروالۍ د تنظیف زیارکښ کارکوونکو د اختر په شپو او ورځو کې هم د ښار په مختلفو ساحو کې خپل تنظیفاتي چارې ترسره کولې او ښاریانو لپاره یې یو پاک او منظم چاپېریال برابر کړی وو
