مهترلام ښاروال د الینګار په مسیر له عمومي سړک څخه لیدنه وکړه او د شته ستونزو د حل په موخه یې سپارښتنې وکړې
د مهترلام ښاروال الحاج مولوي نظر محمد عتیق، چې د لومړۍ ناحیې مدیر ملا عباس ابراهیمي یې ملتیا کوله، د الینګار په مسیر له عمومي سړک څخه لیدنه وکړه او د یادې ساحې وضعیت یې له نږدې وکاته
ښاروال د لیدنې پر مهال د ګډ کمېسیون له فعالیتونو څخه خوښي څرګنده کړه او هغه هڅې یې وستایلې چې د ښاري نظم او د پلو لارو د خلاصون په برخه کې ترسره شوې دي.
نوموړي د سړک په مسیر کې یو شمېر شته ستونزې هم په ګوته کړې او د لومړۍ ناحیې مدیر ته یې سپارښتنه وکړه، چې د تخنیکي او مسلکي انجنیرانو په همغږۍ د حل لپاره لازم اقدامات ترسره کړي
همداراز ښاروال ټینګار وکړ، چې د سړک دواړو غاړو ته ویالې او پلې لارې باید په اساسي او معیاري ډول جوړې شي، ترڅو ښاریانو ته د تګ راتګ خوندي او مناسبې اسانتیاوې برابرې شي
د یادونې وړ ده، چې په دې وروستیو کې د لومړۍ ناحیې مدیر ملا عباس ابراهیمي په مشرۍ د ګډ کمېسیون له لوري له الینګار هډې څخه تر پهلوان بابا پورې د سړک دواړه غاړې له خنډونو پاکې او د ښاریانو پر مخ خلاصې شوې دي، چې له امله یې اوس خلک په اسانۍ تګ راتګ کوي
