د ښاروالیو چارو سمون عمومي رئیس لغمان ته په خپل سفر کې د ولایتي ادارې مسؤلینو او رئیسانو سره د همغږۍ ناسته ترسره کړه
د چارو ادارې لوی ریاست د ښاروالیو چارو د سمون عمومي رئیس مولوي محمد اسحاق اخندزاده لغمان ته په یو کاري سفر کې د دغه ولایت له والي شیخ شېر احمد حقاني، مرستیال والي مولوي اختر محمد مزمل، امنیه قوماندان مولوي نجیب الله بدخشي، مهترلام ښاروال الحاج مولوي رحمت الله شهامت او د یاد ولایت له رئیسانو او د ولسوالیو له ښاروالانو سره د همغږۍ ناسته ترسره کړه
په یاده ناسته کې مهترلام ښاروال په لومړیو کې راغلي پلاوي ته د ښه راغلاست ترڅنګ له نوموړي مننه وکړه چې د ښاروالۍ د کارونو د ښه والي په موخه یې لغمان ته سفر کړی دی
د ښاروالیو چارو سمون عمومي رئیس مولوي محمد اسحاق اخندزاده په یاده ناسته کې لغمان ته په خپل راغلي سفر رڼا واچوله او وې ویل چې دوی له مسلکي کسانو سره راغلي او د مهترلام ښاروالۍ ټولې چارې به وڅیړي او اصلاحات به پکې راولي، همداراز یې زیاته کړه چې د ښاروالیو او امارتي ادارو ترمنځ د همغږي ډیرول، د پروژو څارنه او خلکو ته د ښاروالیو حقوقي حیثیت پیژندل یې د سفر هدفونه دي
هغه همداراز د ولایتي ادارې له مسؤلینو او ټولو رئیسانو غوښتنه وکړه چې له ښاروالۍ سره همکاري وکړي، په هغه ادارو چې د ښاروالۍ ښاري خدماتو محصول پاتې وي باید ژر تر ژره یې اجرا کړي ترڅو ښاروالۍ خپل کارونه پرې ترسره کړي
اخندزاده زیاته کړه چې د ښاروالیو د عوایدو چارې د افمس له لارې په شفاف ډول جریان لري
لغمان والي د ښاروالیو چارو د نظم، فساد څخه د پاکوالي او د شفافې مالي د راټولو په اړه خبرې وکړې او د چارو ادارې لوی رئیس څخه یې مننه وکړه چې د ښاروالۍ د کارونو د ښه والي او اصلاح په موخه یې لغمان ولایت ته سفر کړی دی
د ښاروالیو چارو د سمون عمومي ریاست د ښاروالیو د قراردادونو د برسۍ امر ولي محمد الهام د ناستي په جریان کې د پرېزېنټشن له لاري ټولو ګډوالو ته د ښاروالۍ حقوقي او اړوند د برنامي حیثیت تشریح کړل.
یاده ناسته د لغمان مرستیال والي په دعاعې سره پایته ورسیده
