د مهترلام ښار د بلندمنزلو له مالکینو سره د ودانیزو چارو د چټکتیا په موخه ناسته ترسره شوه
د لغمان ولایت د مرستیال والي حافظ انځرګل عبدالله په مشرۍ او د مهترلام ښاروال الحاج مولوي نظر محمد عتیق په حضور، د ښار او کور جوړونې ریاست د استازي، د ښاروالۍ آمرینو او یو شمېر مدیرانو په ګډون د مهترلام ښار د بلندمنزلو له مالکینو سره د همغږۍ ناسته ترسره شوه
په ناسته کې مرستیال والي د بلندمنزلو له مالکینو وغوښتل، چې د خپلو ودانیو د جوړولو چارې ژر تر ژره پیل کړي، ترڅو له یوه اړه ښار پراختیا ومومي او له بله پلوه ډیری بې روزګاره خلکو ته د کار کولو زمینه برابره شي. نوموړي همداراز د اړینو اسانتیاوو او هر راز همکارۍ ډاډ ورکړ
مهترلام ښاروال الحاج مولوي نظر محمد عتیق هم د همکاریو ډاډ څرګند کړ او له مالکینو یې وغوښتل، چې د ودانیزو چارو له پیل مخکې د ودانۍ نقشه، سکیچ او د خاورې د ټېسټ اسناد له ځان سره ولري، ترڅو چارې د منظور شوو اصولو او په منظم ډول پر مخ ولاړې شي
د ناستې په پای کې د بلندمنزلو مالکینو خپلې یو شمېر ستونزې او وړاندیزونه شریک کړل او د کارونو د پیل ډاډ یې ورکړ
