د مهترلام ښاروالۍ نوبتي اداري ناسته ترسره شوه

د مهترلام ښاروالۍ د ادارې د لا همغږۍ، خدماتو د کیفیت لوړونې او د ښار د پرمختیايي چارو د تعقیب په موخه، د ښاروال الحاج مولوي رحمت الله شهامت په مشرۍ د ښاروالۍ نوبتي اداري ناسته ترسره شوه
یاده ناسته چې د ښاروالۍ له ټولو امرینو او مدیرانو سره وشوه، په پیل کې ښاغلي ښاروال د تېرې ناستې راپور واورېد او د ترسره شویو فعالیتونو ارزونه یې وکړه
ښاروال د هغو چارو یادونه وکړه چې ښه پرمختګ یې کړی و، او په ورته وخت کې یې پر ځینو نیمګړتیاوو هم رڼا واچوله، ترڅو اصلاحات پکې راشي
ورپسې، د ناستې ګډونوالو د ښار اړوند یو شمېر مهمو موضوعاتو، لکه د ښاري خدمتونو پراختیا، نظم، پاکوالي، د کار د جواز د ورکړې او د خلکو ستونزو ته د ژر او مؤثر ځواب څرنګوالي په اړه تفصیلي بحثونه وکړل
همداراز، د مجلس په جریان کې یو شمېر امرینو او مدیرانو ته مشخصې دندې وسپارل شوې، ترڅو تر بلې ناستې پورې یې بشپړې کړي او خپل راپور له رهبري سره شریک کړي
د یادونې وړ ده چې د مهترلام ښاروالۍ مشرتابه تل هڅه کوي چې د منظمو ناستو له لارې نه یوازې ادارې کارونه همغږي کړي، بلکې د ښاریانو لپاره شفاف، مؤثر او پر وخت خدمات وړاندې کړي