مهترلام ښاروال د کار په ښه کیفیت ټینګار وکړ
لغمان کې د مهترلام ښاروالۍ له داخلي بودیجې د ۶ نیم میلیونه افغانیو په ارزښت له ولایت مقام څخه تر کانونو ریاست پورې د کانال او پلچکونو د جوړیدو چارې په چټکۍ روانې دي
یاد کانال چې ۸۳۰ متره اوږدوالی لري په اساسي او معیاري شکل به جوړ شي چې اوس مهال پکې شاوخوا ۳۵ کسانو ته په ورځني ډول د کار کولو زمینه هم برابره شوې ده
مهترلام ښاروال الحاج مولوي رحمت الله شهامت چې د سروې انجنیر فرید احمد نیازي یې ملتیا کوله یادې پروژې څخه یې لیدنه وکړه او د کار د ښه کیفیت په موخه یې د شرکت مسؤلینو باندې ټینګار وکړ
همداراز ښاروال د ښه معیاري او اساسي کارونو د یادونې ترڅنګ زیاته کړه چې کارونه باید د پلان له مخې په وخت ترسره شي
د یادونې وړ ده چې اوس مهال په مهترلام ښار کې د مهترلام ښاروالۍ له لوري د پنځو بیارغونو پروژې چارې روانې دي
