د مهترلام ښار د پلو لارو د خلاصون کمېسیون ترسره شو
د مهترلام ښاروالۍ د لومړۍ ناحیې مدیریت نن د ښار په مرکزي سیمو کې د پلو لارو د خلاصون کمېسیون ترسره کړ. یاد کمېسیون د لومړۍ ناحیې د مدیر ملا عباس ابراهیمي په مشرۍ، د ترافیکو مدیریت او د لومړۍ امنیتي حوزې د مسؤلینو په ملتیا عملي شو
ملا عباس ابراهیمي وویل، چې دوی د رحماني چوک څخه تر درې شمې چوک پورې په ځانګړي ډول د حاجي ایوب مارکیټ مخې ته د کمېسیون چارې ترسره کړې. په دې لړ کې هغه هټۍ وال او دوکانداران چې د خپلو جنسونو په اېښودلو سره یې د تګ راتګ لارې او د ویالو سرونه بند کړي وو، ټول په بشپړ ډول خلاص کړل شول
نوموړی وایي، د پلو لارو د خلاصون دا ډول کمېسیونونه به په دوامداره ډول ترسره کېږي، څو د ښار ترافیکي بهیر منظم او د ښاریانو د تګ راتګ لارې پرانستې پاتې شي
د یادونې وړ ده چې مهترلام ښاروالۍ د ښار نظم او پاکوالي ته ژمن دی او په ورځني ډول خپل چارې ترسره کوي
