مهترلام ښاروالۍ په لومړۍ، دوېیمه او پنځمه ناحیو کې ۳ مختلفې د بیارغونې پروژې پلې کوي
مهترلام ښاروالۍ د سږکال پروژو په دوام له خپلې داخلي بودجې په لومړۍ، دوېیمه او پنځمه ناحیو کې درې د بیارغونې پروژې تطبیقوي، چې نن مهترلام ښاروال الحاج مولوي رحمت الله شهامت له یادو ساحو څخه لیدنه وکړه
ښاروال وویل، چې دوی د لومړۍ او پنځمې ناحیو اړوند د ده ملخ له پله څخه تر قرارګاه پورې د ګلانو او شنو بوټو د ښې ساتنې لپاره ګلدانیو ته کټارې لګوي او همداراز په یاده ساحه کې د برېښنايي تنویري پایو ترمیم ترسره کوي
همداراز نوموړي د درېیمې پروژې په اړه وویل چې د دوېمې ناحيي اړوند د حاجیانو سرک باندې د کانکریټ اچونې د چارو ترسره کول دي چې اوس مهال یې داوطلبي شوې او په نږدې ورځو کې به یې کارونه پیل شي
د یادونې وړ ده چې مهترلام ښاروالۍ سږکال له خپلې داخلي بودجې د سل میلیونه افغانیو په ارزښت په مهترلام ښار کې غټې او وړې پروژې عملي کوي
