د مهترلام ښار د پراختیا او د مستریانو منظمولو چارې روانې دي
د مهترلام ښاروالۍ رهبري د ښاري پراختیا، تنظیم، پاکوالي او د ښار د ګڼې ګوڼې د مخنیوي په موخه یو لړ عملي اقدامات پیل کړي دي، چې یوه مهمه برخه یې د ښاري خدمتونو برابرول، د مهترلام ښار پراخول او د مستریانو منظمول دي
په همدې موخه، د مهترلام ښاروال الحاج مولوي رحمت الله شهامت په لارښوونه، د مهترلام ښار ټول مستریان د ښار له بېلابېلو برخو څخه د پنځمې ناحیې اړوند، د کابل ـ جلالآباد هډې ترڅنګ ترمینل ته انتقالېږي، چې نن د یادو مستریانو لپاره د ځایونو د مشخص کولو چارې ترسره شوې
یاده چاره د مهترلام ښاروالۍ د تعین شوي کمیټې له لوري ترسره شوه چې هر مستري ته به مناسب، ترتیب شوی، او قانوني ځای ورکړل شي
یاده دې وي چې له دې وړاندې د مهترلام ښاروالۍ له لوري د ښار د پراختیا په موخه د موټرو بارکینونه هم همدغه ترمینل ته انتقال شوي، چې دا مهال پکې د موټرو پېر او پلور په منظم شکل جریان لري او ښاریان د ښاروالۍ یاده کړنه ستايي او قدردانی یې کوي
