لغمان کې د مهترلام ښاروالۍ له لوري د نږدې ۲ میلیونه افغانیو په ارزښت د اوبو رسولو د یوې پرژوې چارې پیل شوې
لغمان کې د مهترلام ښاروالۍ له داخلي بودیجې څخه د نږدې دوه میلیونه افغانیو په ارزښت په پارکونو کې چمنونو، ونو او بوټو ته د اوبو رسولو او ذخیرو جوړولو چارې پیل شوې
د یادې پروژې بنسټ ډبره نن د مهترلام ښاروال الحاج مولوي رحمت الله شهامت، د ښاروالۍ تخنیکي او مسلکي آمر انجنیر زاهد الله مجددي، د څارنې او ارزونې آمر الحاج عبدالطیف اخندزاده، د لومړۍ او دریمې نواحیو مدیرانو او د نعمان عبدالحد شرکت مسؤل په لاسونو کېښودل شوه
مهترلام ښاروال الحاج مولوي رحمت الله شهامت وویل: "دغه پروژه د ۱ میلیون ۷۲۲ زره او ۲۴ افغانیو په ارزښت د ښار اړوند څلورو (نازو انا، ځوانانو، داکتر ظاهر او ارچار) پارکونو کې پلي کیږي، ۶ د اوبو ذخیري جوړيږي هره ذخیره به ۶۲ متره مکعبه اوبه ساتي او وخت پر وخت به پارکونو چمنونو، ونو او بوټو ته اوبه ترې رسیږي"
نوموړي زیاته، د یادو ذخیرو او شیردهنونو د جوړولو چارې به درې میاشتو کې بشپړې شي او ګټه اخیستنې ته به وسپارل شي
ددې ښار اوسیدوونکو او پارک ته راغلو محصلینو بیا په خپلو خبرو کې د مهترلام ښاروالۍ دغه اقدام وستایه، هغوی وویل د ښار ټولو پارکونو ته هره ورځ لسګونه تنه د سیل او درس ویلو لپاره راځي، ددې پروژې په جوړیدو سره به چمنونه شنه، ونې او بوتي به پروخت اوبه شي هم به ورسره د ښار او پارکونو ښکلا زیاته شي
د نعمان عبدالاحد ساختماني شرکت مشر عبدالاحد چې د پروژې ساختماني چارې پرمخ وړي د ښاروالۍ مسولینو او ښاریانو ته ډاډ ورکړ چې د پروژې کارونه به د نقشې مطابق په ښه کیفیت په خپل وخت پای ته رسوي
د یادونې وړ دی چې په یاده پروژه کې شاوخوا ۲۵ کسانو ته په ورځني ډول د کار کولو زمینه هم برابره شوې ده
