د ښاري نظم او د پلو لارو د خلاصون ګډ کمېسیون په مهترلام ښار کې پراخ کمپاین ترسره کړ
د ښاري نظم د ټینګښت او د پلو لارو د خلاصون په موخه هغه ګډ کمېسیون چې د ولایت مقام له لوري ترتیب شوی او مشري یې د ترافیکو مدیر مولوي حبیبالله مبارز کوي، نن د مهترلام ښار په بېلابېلو برخو کې خپل پراخ کمپاین ترسره کړ
یاد کمېسیون چې په ترکیب کې یې د مهترلام ښاروالۍ، لومړۍ امنیتي حوزې، ترانسپورټ مدیریت او د اصنافو ریاست مسؤلین شامل دي، د هغو دوکاندارانو او هټیوالو پر وړاندې عملي اقدام وکړ چې د جنسونو، ترپالو او بېلابېلو توکو په وسیله یې پلې لارې بندې کړې وې
د کمېسیون له لوري د سرغړونکو دوکانونه مهرلاک او پلې لارې د ښاریانو پرمخ په بشپړه توګه پرانیستل شوې
د ترافیکو مدیر او د ګډ کمېسیون مشر مولوي حبیبالله مبارز وویل، چې د نن ورځې په کمپاین کې له درېشمعې چوک څخه تر رحماني چوک پورې د سرک دواړه غاړې په بشپړه توګه خلاصې شوې، نوموړي زیاته کړه، چې دا لړۍ به دوام ولري تر څو د ښار ټولې پلې لارې د ښاریانو پرمخ پاکې او خلاصې شي
همداراز ترافیکو مدیر ښاغلي مبارز وویل، چې د کمېسیون له لوري د لاسي کراچیو پلورونکو لپاره ځانګړي ځایونه مشخص شوي او ټول پلورونکي مکلف دي چې پر ټاکل شویو ځایونو کې خپل فعالیت ترسره کړي، هغه دا هم زیاته کړه، چې د ریکشو د منظم کولو لپاره هو یوه طرحه جوړه کړې چې د ولایت مقام له تائید وروسته به عملي شي
د مهترلام ښاروالۍ د لومړۍ ناحیې مدیر ملا عباس ابراهیمي وویل، چې د ګډ کمېسیون له لوري د ښاري نظم ټینګښت ته ځانګړې پاملرنه شوې او هېچا ته به اجازه ورنه کړل شي چې په ښار کې بېنظمي رامنځته کړي
د یادونې وړ ده چې مهترلام ښاروالۍ د ښار د پراختیا، نظم او ښاریانو ته د اسانتیاوو د برابرولو په موخه خپلې هڅې روانې ساتلې دي او په دې برخه کې به عملي اقدامات لا هم دوام ولري
