لغمان کې د ۳۴ میلیونه افغانیو په ارزښت ډاکټر محمد ظاهر په نوم جوړ شوی تفریحي پارک ګټې اخیستنې ته وسپارل شوو
ددغه پارک د ګټې اخیستنې په مراسمو کې د لغمان مرستیال والي الحاج شهزاده مظلوم یار، مهترلام ښاروال انجنیر نظیف الله الکوزي سربېره، دولایتي شورا رئیس، د بېلا بېلو ادارو مسوولینو، د ښاروالۍ مشورتي بورډ غړو، ځوانانو او ګڼو نورو برخه اخیستې وه.
د مهترلام ښاروال نظیف الله الکوزي د معلوماتو له مخې چې د هندوستان هېواد په په مالي لګښت په ۷۵ جریبه ځمکه کې سلطان غازي بابا ښارګوټي اړوند R4 سیمه کې د هېواد پخواني لومړي وزیر ډاکټر محمد ظاهر په نوم جوړ شوی پارک یې ګټې اخیستنې وسپاره.
نوموړی وایي، په دغه پارک ۳۱ میلیونه افغانۍ د هندوستان هېواد له لوري او ۳ میلیونه دمهترلام ښاروالۍ له لوري د اوبو سیستم، د ازادۍ څلي او سرسبزۍ کې په لګښت رسیدلي چې په یو نیم کال کې چارې بشپړې شوي.
دلغمان مرستیال والي الحاج شهزاده مظلوم یار خوښي اوښوده او د مهترلام ښاروالۍ له رهبرۍ یې مننه وکړه چې په دې ولایت کې یې د رغونې لړۍ په خورا ښه شکل روانه کړې ده.
هغه دمهترلام ښاروالۍ او د سیمې له خلکو غوښتنه وکړه چې ددغه پارک په ساتنه کې ځانګړې پاملرنه ولري.
د ولایتي شورا رئیس عتیق الله عبدالرحیمزي هم خوښي اوښوده چې د مهترلام ښاروالۍ په هڅو د ځوانانو ولسونو لپاره د تفریح ځانګړی ځای جوړ شوو.
په درنښت
۱۳۹۹/۹/۲۲
