د مهترلام ښار اړوند له الینګار هډې څخه تر پهلوان بابا پورې د پلو لارو د خلاصون ګډ آشر ترسره شو
د مهترلام ښاروالۍ د لومړۍ ناحیې مدیر ملا عباس ابراهیمي په مشرۍ، چې د ترافیکو مدیر مولوي حبیب الله مبارز، د ترانسپورټ ریاست او لومړۍ امنیتي حوزې مسؤلینو یې ملتیا کوله، د ګڼهګوڼې د مخنیوي او د پلو لارو د خلاصون په موخه ګډ آشر ترسره شو
یاد آشر د مهترلام ښار له الینګار هډې څخه تر پهلوان بابا پورې د عمومي سړک په اوږدو کې ترسره شو، چې په ترڅ کې یې هغه هټۍوال او دوکانداران تنظیم شول چې د ترپالونو، چترۍګانو او نورو توکو په وسیله یې پلې لارې بندې کړې وې. د آشر په پایله کې پلې لارې په بشپړه توګه د ښاریانو پر مخ خلاصې او منظمې شوې
د لومړۍ ناحیې مدیر ملا عباس ابراهیمي دوکاندارانو او هټۍوالو ته خبرداری ورکړ، چې د پلو لارو د خلاص ساتلو او ښاري نظم د مراعاتولو په برخه کې جدي پاملرنه وکړي. نوموړي زیاته کړه، چې له یادې ساحې څخه په دوامداره توګه څارنه ترسره کېږي او له سرغړوونکو سره به قانوني چلند کېږي
همداراز د ترافیکو مدیر مولوي حبیب الله مبارز وویل، چې دغه ګډ فعالیت د ترافیکي نظم د ټینګښت او د ترافیکي پېښو د مخنیوي په موخه ترسره کېږي، او په راتلونکي کې به هم ورته اقدامات دوام ولري
د یادونې وړ ده، چې د مهترلام ښاروالۍ له لوري د ښاري نظم، د پلو لارو د خلاصون او د ښاریانو د اسانتیاوو د تأمین په موخه ورته ګډ آشرونه په منظم ډول وخت پر وخت ترسره کېږي
