په دویمه ناحیه کې د سرک د کانکریټ اچونې چارې پیل شوې
د مهترلام ښاروالۍ له داخلي بودیجې څخه د ۱۰ میلیونه افغانیو په لګښت د دویمې ناحیې اړوند د حاجیانو کلي د سرک د کانکریټ اچونې چارې په منظم شکل جریان لري
د مهترلام ښاروالۍ مطبوعاتي مسؤل لعل آغا ابراهیمي وویل، یاده پروژه چې د ښاروالۍ له داخلي بودیجي تمویل کېږي، د ۳۶۰ مترو په اوږدوالي او ۱۵ مترو په پلنوالي د سرک کانکریټ اچونه، دواړو غاړو ته د ویالو جوړول او د یوې غاړې په اوږدو کې د استنادي دیوال جوړول پکې شامل دي
د هغه په وینا، د اړوندو ابتدایي کارونو بشپړېدو وروسته اوس مهال د کانکریټ اچونې چارې په منظم ډول پر مخ روانې دي او مهترلام ښاروال، الحاج مولوي رحمت الله شهامت، وخت پر وخت د پروژې له ساحې څخه لیدنه کوي ترڅو د کار د ښه کیفیت ډاډ ترلاسه کړي
ښاغلي ابراهیمي زیاته کړه چې د یادې پروژې د کیفیت د تضمین لپاره د مسلکي او تخنیکي انجینرانو شتون حتمي ګرځول شوی او ټول کارونه د هغوی تر څارنې لاندې پرمخ ځي
د حاجیانو کلي اوسېدونکي د دې پروژې له پیل څخه خوښي ښيي او وایي چې د سرک په جوړېدو سره به یې د تګ راتګ ستونزې هوارې او ورځني ژوند کې به یې اسانتیاوې زیاتې شي
د یادونې وړ ده چې په دې پروژه کې په ورځني ډول شاوخوا ۵۰ کسانو ته د کار کولو زمینه هم برابره شوې ده
