په مهترلام ښار کې د ښوونځیو لپاره د پاک چاپېریال ساتنې د عامه پوهاوي د کمیټو جوړولو لړۍ پیل شوه

لغمان کې د مهترلام ښاروالۍ د ښاري حکومتولۍ امریت له لوري د ښاري پاکوالي او د عامه پوهاوي د پراخولو په موخه د ښوونځیو د زده کوونکو او ښوونکو په منځ کې د پاک چاپېریال ساتنې د عامه پوهاوي کمیټو جوړولو لړۍ پیل شوه
د مهترلام ښاروالۍ د ښاري حکومتولۍ امر الحاج عباس عمري د دې برنامې د پیل پر مهال وویل، چې دا لړۍ به د مهترلام ښار په ۱۲ ښوونځیو کې تطبیق شي، نوموړي زیاته کړه چې د دې نوښت موخه د زدهکوونکو او ښوونکو ترمنځ د پاک چاپېریال ارزښت په اړه عامه پوهاوی لوړول او د ښاري نظم په ټينګښت کې د خلکو همکاري پراخول دي
د یادې برنامې لومړی پړاو د مهترلام ښار د پنځمې ناحیې اړوند د مهترلمک ښوونځي څخه پیل شوه، چې دولس ښوونځیو کې به تطبیق شي
عباس عمري د مهترلمک ښوونځي له رهبریت څخه غوښتنه وکړه چې زده کوونکي د پاک چاپېریال ساتنې په اهمیت پوه کړي تر څو یاد زده کوونکي دا پیغامونه خپلو کورنو او ټولنې ته ورسوي
په ورته مهال، د مهترلمک ښوونځي امر عبدالصمد صافي ، استادانو او زدهکوونکو د ښاروالۍ له دې ارزښتناک اقدامه مننه وکړه او ژمنه یې وکړه چې د پاک چاپېریال ساتنې په برخه کې به فعاله ونډه واخلي، د ښاروالۍ د پاک چاپېریال ساتنې پیغامونه به ښوونځي کې د تطبیق ترڅنګ خپلو کلیو او کورنو ته هم ورسوي