د لغمان په ولایت کی د څه کم سل میلیونه افغانیو په ارزښت د سرخکانو ملي پارک د احاطې او استنادي دېوال د جوړېدو چارې پیل شوې
د لغمان ولایت د قرغیو ولسوالۍ اړوند د کابل- جلال آباد پر لویې لارې په (۷۰۰) جریبې زمکې کې د دغه پارک د جوړېدو بنسټ ډبره نن رسماً د لغمان والي ښاغلي محمد آصف ننگ، امنیه قومندان سمونوال منظور ستانکزي، د ښار جوړونې او زمکو رئيس، د مهترلام ښاروال، د قرغیو ولسوال، ښاروال او گڼ شمېرو نورو مسؤلینو او د سیمې د خلکو په شتون کې پیل شوې.
د لغمان ولایت د ښارجوړونې او زمکو رئیس وفيع الله اسحاقزوی د معلوماتو له مخې چې د کابل- جلال آباد پر لویې لارې د سرخکانو سیمې کې یې د ملي پارک لومړۍ لاټ (۲۶۰۰) متره استنادي او (۵۲۰۰) متره احاطوي دېوالونو د جوړېدو چارې رسماً پیل کړې چې ټول ټال پرې (۹۹۸۵۷۸۸۵( افغانۍ لگښت راځي.
نوموړی وایي، د سرخکانو ملي پارک د لومړي لاټ پروژې چارې به د یوه نیم کال په مودې کې بشپړې او ژر به یې د دویم لاټ کارونه هم پیل شي.
په ورته مهال د لغمان والي ښاغلي محمد آصف ننگ خوښي وښوده او د سرخکانو ملي پارک د چارو پیل یې د جمهور رئیس هغه ژمنه یاده کړه چې د دې ولایت له ولسونو سره یې کړې وه.
هغه وایي، چې د دغه پارک پر ټولو برخو به تقریباً (۳۶۰) میلیونه افغانۍ لگښت راشي چې (۴۰۰۰) کاري فرصتونه به په کې برابر شي.
نوموړي وویل، د سرخکانو ملي پارک کې به هوټلونه، لوبغالي، د لاسي صنایعو نمایشگاه، شنې ساحې او گڼې نورې برخې هم جوړې شي.
د لغمان والي دغه راز زیاتوي چې د سرخکانو ملي پارک کې به تر (۲۰۰) میلیونو افغانیو پورې خصوصي سکټور ته هم د پانگونې اسانتیاوې برابرې شي.
د سرخکانو ملي پارک موقعيت ته په کتو به ورسره د سیمې امنیت، ټولنیزو او اقتصادي او هراړخیزو چارو کې ستر بدلون راشي.
۴/۲/۱۳۹۹
